الموضوع خاص بطلبة استراليا 

 

وبعد عناء مرير وجهد بطيخ … سوف يقام “العرس الديموقراطي” الكويسترالي (طلبة الكويت في استراليا) ليقوم بعدها اول اتحاد كويتي لطلبة الكويت في استراليا.

 

اول شي … 

المجلس التأسيسي : دور المجلس التأسيسي هو وضع اللبنة الأساسية (حلوه اللبنة ها) للاتحاد .. يعني كمقر وميزانية وهالسوالف … وسبحان الله سبحان الله .. متى تأسس ومتى اشتغل ومتى سوو ….. الله واعلم 

 

ثانيا : الانتخابات 

بالأمس تم تحديد موقع الانتخابات والتي سوف تكون في نهاية شهر مارس ان شاء الله .. يعني راح يحق لكل طالب انه يصوت ويختار احد يمثله بالاتحاد … 

 

لحظة … يحق لكل طالب !!!

 

خل نعيد التفكير بالموضوع 

١. اختاروا ملبورن علشان تكون مقر التصويت .. يعني اللي من كانبرا/سيدني/اديلايد/برزبن وجولد كوست/ بيرث الفقارى …. يردون داخل السور (يعني يروحون ملبورن)

 

٢. محد ذكر سبب اختيار ملبورن .. على الرغم من ان كانبرا عاصمة رسمية ولو اختاروها كان الوضع بالسليم. بس ليش ملبورن !! بيجيكم العلم 

 

٣. اختيار عطلة عيد الفصح (الايستر) واللي ما شاء الله الأسعار مو بس نار الا ولعة

 

عالسريع 

 

من سيدني : ٢٩٠ دولار 

من بيرث : ٦١٠ دولار 

من جولد كوست : ٢٧٠ دولار

 من برزبن : ٣٦٠ دولار 

من اديلايد : ٢٥٥ دولار

من كانبرا : ٣٢٨ دولار 

(الأسعار بالاعتماد على تايجر ما عدا فيرجن استراليا لكنابرا ، بالإضافة الى اختيار أوقات مناسبة للسفر “ان شاء الله ما أقوم لك ٦ الصبح يوم عطلة “) 

يعني ما شاء الله 

تذكرة الطيارة بروحها كافية ان تعفس ميزانيتك لشهر جدام 

وطبعا مكتبنا الثقافي يخون بنزلة المعاشات فماكو أمان 

بس هم لحظة .. هذي بس تذاكر الطيارة، اكو مصرف وفندق 

يعني بخلطة سحرية حلوه ، صوتك = ٥٠٠ دولار للطلبة في كل الولايات ،  وتقريبا ٧٥٠ دولار لطلبة بيرث 

 

وبلاااااااااااااش لطلبة ملبورن 

ركزوا بلاااااااااش

 

انزين ركزوا معاي 

علشان تصوت بمجلس الأمة … مجلس الأمة 

بس جيب جنسيتك وتعال 

 

بس علشان تصوت باتحاد طلبة بقارة مقطوعة عن العالم وبعد شهرين بيسوون لها كوكب بروحها … لازم تدفع ٥٢ دولار 

 

لاحظوا ال٢ دولار (والله حق الشركة والاتحاد ماله شغل) اقول شخبارك 

يعني يدرون وضع الطلبة المادي ، ويدرون صارلنا سنين نغني على موضوع الزيادة  ، يطلعون لي بعطلة ان ندفع ٥٠ بالهوا !!! 

 

ترا واجد … لا جد واجد 

انزين نرد إلى موضوع اختيار ملبورن 

١.  من الناحية العقلية الفكرية ، كانبرا سوف تكون الأنسب ، لانها تحتوي على المراكز الرئيسية للحكومة الأسترالية اذا كان لهم علاقة ، وتحتوي على المكتب الثقافي واللي راح يكون التواصل معاه أكثر جدية 

٢. من الناحية المعمارية: سيدني تحتوي على افضل البنايات ومن حيث المساحة سيدني الأم الحنون 

٣. لا اعلم عن عدد الطلبة ولكن اذا احد بيقولي ان ملبورن فيها أكثر الطلبة فبذكرك طلبة أمريكا انتخاباتهم في واشنطن اللي ما عمري سمعت احد يدرس فيها … ارد وأقول شخبارك 

 

اذا ما السبب الوحيد اللي يخلي المقر في ملبورن ؟ 

فكروا شوي … ماكو الا سببين 

١. ان معظم من سوف يكونون في الاتحاد من ملبورن …..ممكن 

٢. ان معظم مؤيدي احد القوائم التي لها فاعلية موجودين في ملبورن … اوووببااااا 

 

نعم يا صديقي العزيز / أختي العزيزة (علشان الرقابة) 

 

أني أرجح السبب الثاني 

المهم ، ان الله يوفقهم ويطرح فيهم البركة 

بس شغل تبربس … ما يدور عندي

واخر شي اقول

لا تفرحين بالعرس ترا الطلاق باجر

——————————————