السلام عليكم

قبل 5 شهور تقريبا ، فيفا ( الشركة المحترمة ) كانت مسويه مسابقة عن الشغف ، المسابقة بكل بساطة عبارة عن المشاركة بعمل فيديو يعبر عن شغفك ، بحيث لا يتعدى الفيديو حجم 4 ميجا بايت ( شرط قاتل ) بس ممكن التغلب عليه …. وكنت موجود بسيدني ، فجمعت الشباب اللي كانوا ساكنين وياي وعرضت عليهم الفكرة ، والحمد لله لقيت واحد متطوع أصوره وطلع معانا هالفيديو

الفيديو من وجهة نظري كان حلو ( طبعا انا ما يعجبني العجب ) بس قلت خل أسأل الناس ، والحمد لله واجد عجبهم …. طبعا انا الحين مو قاعد اتكلم عن الفيديو اذا زين ولا لا

صلب الموضوع : يمكن اللي ما شاركوا بالمسابقة أو شاركوا وما اهتموا ما يدرون عن اللخبطة اللي صارت مع فيفا (الشركة الكبيرة اسما القصيرة عمرا) من ناحية التنسيق والتنفيذ ،

فيفا – للأسف كان عندها تخبط كامل ومميت من ناحية عمل المسابقة …. الجائزة كانت سيارة اودي ار 8 ، فطبعا الكل قالي ( راح يستنفعون وينجحون ربعهم علشان يردون السيارة ) قلت لا ، خل نشارك يا نفوز يا لا وربكم يوفقنا

قدمنا الفيديو ، وكان من أجمل الفيديوات اللي شاركت … انزين حبايبي فيفا شلون اصوت ؟ قالوا عندك طريقتين ، واحد انك تصوت بالانترنت ، او انك تدز رسالة قصيرة (لمشتركي فيفا فقط) وتكلفة الرسالة (شي لا يذكر يا حبايبي) وهي 20 فلس

حلو

بدا التصويت ، وبدينا نكلم الناس ان (اذا عجبكم الفيديو)صوتوا … لاحظوا (اذا عجبكم الفيديو) ومشت الامور على اساس صوت واحد لكل شخص .نتفاجيء ان بيوم وليلة في فيديوات قاعد تنط 3000 صوت ، رقم كبير مو صغير ترا . قعدنا يمين يسار نشوف شالوضع ، ليما واحد من الشباب جرب يصوت مره ثانيه .. ولا ينفع .. ينفع!!!!!! يعني كل هالاصوات ممكن تكون من شخص واحد

يا الهي

انزين وين المصداقية دام السالفة جذي ؟

قمت ودزيت لاكاونت فيفا (تويتر) عن السالفة وكالعادة الاكاونت الوحيد اللي بالدنيا اللي يطنش (او يطنشني انا ان صح التعبير) لذلك دورت على كل اكاونتات اللي يشتغلون بفيفا و دزيت لهم ، ليما وصلت إلى اكاونت المدير التنفيذي السيد سلمان البدران وما قصر كلم الاكاونت (اللي كل يطنشوني وهو اكاونتهم الرئيسي) ، وماشاء الله 3 دقايق الا واحد دازلي رقم تلفونه يقول كلمني (ماشاء الله ، صارلي 3 ايام اطر منكم تردون علي الحين يوم شسما… صرتوا…. ) دنيا .

دقيت عليه(بدون ذكر اسامي) (وانا باستراليا) وقلت له شنو المشاكل اللي موجودة بالموقع وكانت كالتالي

برمجة الموقع ضعيفة جدا جدا جدا ولا تليق بشركة نفس فيفا

اي شخص يقدر يصوت اكثر من مره وهذا يخل بمصداقية التصويت

اي واحد يعرف بالبرمجة بامكانه عمل برنامج آلي ذاتي للتصويت وهو حاط رجل على رجل

قالي اوكي خلاص ، راح نشوف

وفعلا بعد يومين لغوا التصويت بالانترنت واقتصرت على المسجات ( انزين في مشكلة ليش تمسحه من اساسها ، صلح المشكلة ) ولا تبون سعر المسجات ؟ وطبعا كل أصوات الانترنت انمسحت

طنشنا وقلنا يلا يا شباب الرسايل مفتوحة وكل واحد يشتغل على ربعه بالكويت ، يمكن كانت مشكلتنا الوحيدة ان كنا برا الكويت وهذا اللي كان رابط ايدنا . وفعلا دقينا على اهالينا وقلنا لهم صوتوا . بس هما انت مما تجبر الناس انهم يدفعون علشان حضرة جنابك

وكملت العملية يومين

ليما واحد من ربع اللي معاي من البيت اتصل ، وقال لنا بالحرف الواحد

شباب انا توني دقيت على فيفا وسألتهم ، يصير اعطيكم فلوس وتحسبونها اصوات بدال لا اقعد ادز رسايل

الجواب الصدمة ان الموظف قال له : اي

اي ؟؟؟ بهالبساطة ؟ هذا معناته ان لو اروح اخذ قرض من البنك واعطيه فيفا راح يعطون اصوات وانا اضحك وغيري قاعد يكرف ما بقى احد بالكويت ما دق عليه حتى سيلانيتهم

قلت حق الشباب خلاص انا ادق على نفس الشخص من فيفا واكلمه واقوله واتاكد منه

ثاني يوم اهلي دازين لي “مبارك ، ترا فيفا قاموا يحطون فيديوات بالتلفزيون ، وين الفيديو مالك” انا هني تنحت ، ما جابوا خبر عن تلفزيون او شي ، جان اقوم ادق على هالشخص واقوله التالي

اولا : ابي اتأكد من سالفة الفلوس هل اقدر اعطيكم

ثانيا : ابي اعرف على اي اساس تحطون فيديوات

الجواب الاول : لا غلط ما يصير ، الهدف من المسابقة ان الناس يشترون خطوط فيفا ويدزون ( يشترون خطوط فيفا ؟؟؟؟ حلو عاشت المنفعة )شكرا

الجواب الثاني : عندنا لجنة خاصة تختار الفيديوات ( لجنة خاصة …. اي قلتلي) شكرا

هالكلام كان برمضان ، والمفروض المسابقة تنتهي 30\8

نتفاجيء ان فيفا مددوا المسابقة إلى 15\9

ليش ؟ الفكرة الأساسية ان “فيفا ما طلعوا فلوس السيارة” وهذا كانت فكرة الناس واحنا نقول لا عادي قاعد يعطون فرصة للمشاركين

وصلنا 15\9 ، جان نتفاجيء ان تم تمديد المسابقة إلى 20\10

اهني اقتنعنا ان صج ما طلعوا فلوس السيارة وعلشان جذي كل مره قاعد يمددون

المهم بنص هالفترة وصلنا إلى اكثر من 30 الف صوت وكان مجهود جبار

واذ بيوم من الايام نقوم الصبح نشوف شنو صار على المسابقة ولا نلاقي ان اصوات طاحت من 30 الف إلى 7 الاف …. من المركز الاول إلى مركز الله اعلم فيه

اي ليش ؟؟؟ حاولت اتصل فيه ولكن كان مشغول ، دزيت له مسج قلت له اني ابي اعرف ليش طاحت الارقام، دزلي مسج بالرد (ممكن تدق علي) ان شاء الله

جوابه خلال المحادثة كان ” هذا خلل بشركة الانترنت اللي متعاقدين معاها ” شركة انترنت شكو ؟؟ قولي شركة مسجات اصدقها .. بس لحظة انتوا مزود الخدمة يعني الخلل عندكم ولا انا غلطان .. ما علينا من الامور التقنية .

قالي : ان بس خلل مؤقت وكل شي راح يتصلح والارقام محفوظة … شلون ارقام محفوظة وشلون خلل

قلت ماشي نشوف اخرتها معاكم

ثاني يوم الصبح ، ولا من 7 الاف صوت إلى 774 صوت

لااااااااااااااا هذا شي ما ينسكت عنه ، يمين يسار عدل بدل ، نفس الكلام

نطرنا ونطرنا ونطرنا ، ليما واحد من الشباب قال : ترا ردت الارقام

نتفاجيء ان ارقام الأصوات حتى ما وصلت نص اللي كنا موصلينه

يعني قبل كنا 30 الف ( وكان التصويت شغال ) والحين حتى ما عدا 14 الف يعني هل 14 الف مع اصوات الناس الجديدة ولا بس جزء من الرقم السابق؟

اسئلة وايد ومو قاعد الاقي اجابة لها

بعدين فجأة لقينا في فيديوات قاعد تنحذف ، اهني عرفنا ان العملية مفبركة بالكامل

يعني

أولا : يبون يطلعون سعر السيارة

ثانيا : يبون يعطونها لشخص معين

ثالثا : سوء تنظيم لشركة بمثل هذا الاسم

رابعا : فشل اداري كبير

خامسا : دامكم مو قد المسابقات تسوونها ليش

امس او قبل امس اعلنوا الفايز

تخيلوا اعلنوا الفايز بالمسابقة بعد 3 شهور تقريبا

وطبعا الموقع صكروه بعد المسابقة مباشرة علشان ما نقدر نشوف نتايجنا

بالمبارك عليك ويستاهل اللي فاز ، والله يعطيه خيرها ويكفيه شرها

-هذا بفرض حسن نية انه مشارك حاله حالي-

طبعا السؤال اللي راح ينسأل : وانت ليش نطرت كل هالفترة علشان تتكلم ، ليش ما تكلمت من أول

الجواب : نطرت ليما يعلنون الفايز علشان (اذا كان تعبان نفسنا ) ما يروح تعبه هدر ونبارك له بالجائزة

علشان جذي نطرت ليما سلموه السيارة

وبس ، رسميا …. بطلع العين الحمرة على فيفا