اليوم حبيت اقدم لكم وصفة خفيفة وهي عبارة عن كيكة … اذا ماكوا شغل قوموا الحين سووها

أولا :  الكيكة

نحضر ٣/٤ كوب زبدة سائحة / ذائبة ، مع  ٣/٤ كوب سكر .. وينضربون بالخلاط .
بعدين نحضر 3 بيضات ، وكل شوي نحط وحده بالخلاط ونخلط وبعدها الثانية ونخلط وبعدها الثالثة ( يعني مو كلهم بوقت واحد ) بعدين نحط نص ملعقة صغيرة فانيلا بودر مع ٣/٤ كوب حليب سائل ونضيف عليهم ملعقة بيكنج باودر وبعدين نحط ٢ كوب طحين ووياهم رشة ملح خفيفة وينخلطون مع بعض
ملاحظة : ما نحط الطحين دفعة وحده .. نخليه بالتدريج يعني نحط ونخلط وبعدين نضيف شوي ونخلط وجذي

بعد ما ينخلط عدل . نجيب قالب ( اذا كان تيفال ما يحتاج زيت ولا طحين ) ولكن اذا ما كان تيفال ( ونوع يلزق )ندهنه بزيت ونرش عليه طحين بعدين نقلب القالب ونطقه علشان ينزل الطحين الزايد . ونصب الخليط فيه ونحطه بالفرن

الفرن لازم قبله بخمس دقايق يكون شغال علشان تتوزع الحرارة داخله . ويكون على درجة 200

نحط القالب وبعدها بخمس دقايق من وضع القالب ننزل الحرارة إلى 180 . ننطر نص ساعة بدون لا نفتح الفرن ابدا علشان لا يطلع الهوا الحار ويدش البارد. بعد النص ساعة نشب الفرن من فوق بعد . علشان نتأكد ان الكيكة استوت ندخل عود اسنان بالنص اذا طلع نظيف يعني الكيكة مستوية غير جذي معناته الكيكة ما استوت

—————————————————————————

صلصة التوفي

نحط ربع علبة زبدة بالمقلاة ونخليها تذوب شوي .. وبعدين نحط كوب سكر صغير ( مقدار استكانتين شاي تقريبا ) و نحركهم ليما يصير السكر كراميل بني ونستمر بالتحريك . بعدين نضيف عليهم قيمر (كي دي دي صغير) مع شوية حليب سائل ونحركهم . راح يصير التوفي كتلة جامدة . حركوا ليما تذوب

ملاحظة : ديروا بالكم لما تحطون القيمر لان راح يسوي تشششش عليكم

وبس لما يذوب ، نصبه على الكيكة اللي سويناها

و بالعافية