السلام عليكم

من الفراغة قلت خل أقوم واسوي شي .. طرى على بالي اسوي فطاير بما ان كل شي عندي بالمطبخ بس اللهم ناقصني حليب . رحت شريته

نبلش؟ يلاااا

المقادير

طحين ( 3 أكواب تقريبا ) اي نوع عادي

حليب

زيت زيتون

خميرة

ملح

سكر

أول شي ، نذوب الخميرة (ملعقة كبيرة) في كوب ماء دافيء . ونحركه شويه علشان ينسجم .. ونخليه 4-5 دقايق

نجيب وعاء كبير علشان العجن . ناخذ عدد 2 كوب طحين ونحطه بالوعاء

الحين نجيب كوب فيه ماي دافي ونحط فيه ملعقتين شكر كبار ونحركه

بعدين نجيب قفشة صغيرة ونحط فيها زيت زيتون  ونضيفها على الماي والشكر

الحين نضيفه على الطحين .. ونحط فوقه قفشه صغيره ملح ( لاحظوا ان زياده الملح تبطل عمل الخميره فلا تكثرون منها ) احم احم حكم

ونبدي نعجن ، سواء العجن كان بمكينه او يدوي .. النتيجه واحده . بس بما ان ما عندكم شغل ، استعملوا ايدكم شوي

والحين دور الخميره ، نصب خليط الماي والخميره اللي خليناه يتنقع قبلها بوقت بالوعاء علشان نكمل عجن

نلاحظ بالصورة السابقة ان الخليط صار سائل زيادة عن اللزوم ، في مثل هالحالات ، نزيد كمية الطحين ونظل نعجن إلى ان نصل إلى مستوى متماسك شوي

الحين خلصنا العجن … نغطي الوعاء بقصدير او نايلون ونخليه علشان تنتفخ العجينة … بالكويت بما ان صيف وحر ، راح تنتفخ بسرعه . بس بما ان عندي برد بــ سيدني . خذت تقريبا ساعتين ونص . حتى اذا طولت ما عليه

نشوف اهني انتقاخ العجينه مبين من برا وهذا دليل نجاحكم … اهنئكم

الحين نبلش الحشو والفرن

عجينتنا وطلعت شزينها … اغراء

الحين محتاجين جم شغله

أولا : زيت

ثانيا : بيضه

ثالثا : الحشوه المطلوبة – جبن ، كرافت ، زعتر ، نوتيلا

رابعا : سمسم أو زعتر

بالنسبة للزيت : اذا لقيتوا السبراي كان بها ، ما لقيتوا ، عادي كلينكس يفي بالغرض

البيض : نمسح فيه الجزء العلوي للمعجنات ، يعطينا اللون الذهبي بالإضافة تلزق عليه حبات السمسم او الزعتر

انا عن نفسي استعمل قوالب ، أريح . بس اذا حابين تشكلون المعجنات بشكل يدوي ما فيها اي مشكلة

نرش القالب بالسبراي أو ناخذ بالكلينكس ونحط فيه زيت ونمسح القالب علشان لا تمسك فيه العجينة

نحط كمية صغيرة لكل حبه ( لا تنسون راح تنتفخ بالفرن ) لاحظوا هالنقطة

نحشيهم بالحشوة اللي احنا حابينها نفس ما ذكرت سابقا

وبعدين نمسح عليها بالبيض ونرش عليها السمسم أو الزعتر

نشغل الفرن ونخليه يسخن شوي ( على درجة 180 ) ونخليه 7-10 دقايق

ندخل القالب بالفرن بعد ما سخن ، ونطل عليه بعد ربع ساعه ..  وبعدها كل 5 دقايق نطل عليه ليما نشوف ان الوجه صار لونه ذهبي حلو وعجينتنا صارت متماسكه

وهذا الشكل النهائي لفطيرتنا … طبعا الطعم ما شاء الله خطير .. وبدون أي مبالغه خلصت كل الفطاير وانا اكتب البوست .. علي بالعافية

يالله سوو وسولي منشن بالانستجرام او تويتر بنتايجكم