السلام عليكم

امس قررت اني اروح معرض الكتاب في أرض المعارض الدولية في مشرف . طبعا الحمدلله لازم سنويا اروح معرض الكتاب . استانس لما الاقي كتب حواليني … كتب كتب كتب

طلعات من البيت الساعة 10 الصبح . وصلت هناك تقريبا ( مع الصفطة ) 10:35 .. كانت فيه مواقف واجد ، ما كان في زحمة باستثناء كثرة المدارس هناك . وهذا شي حلو ( قمت اتذكر ايام المدرسة لما كنا نروح معرض الكتاب واقوم واتفلسف واشتري دواوين شعر غزل فصيح ) المهم ، خذيت الكاميرا مالتي وهذي اول مره اخذ فيها الكاميرا برا البيت شوي تحدي

بهالممر حاطين صور قديمة مثل طابع قديم و اول مره كتاب وجذي يعني ذكريات معرض الكتاب او تاريخ معرض الكتاب ان صح التعبير

دشيت المعرض وطبعا نفس الترتيب ونفس العارضين ماكو شي يديد باستثناء الكتب ، ولكن في بوث عجبني وايد حق مشروع اسمه “الجليس” المشروع هو عباره عن ناد للقراءة والكتابة . يسوون مهرجانات ومسابقات للمهتمين بهالمجال . الفكرة عجبتني وايد وحبيتها وسجلت معاهم . ويوم الخميس الصبح كانوا مسووين حلقة صغيرة حق الأطفال يقولون لهم قصص ، عندهم فكر وايد حلوه

اول محطة كانت لي هي بوث الشركة المصرية لتطوير المنتجات ، لقيت عندهم سيديات صوتية لــ إبراهيم الفقي ، نوعا ما استمتع بكلامه وخصوصا ابي شي حق السيارة فقلت خل استفيد من هالوقت اللي اسوق فيه خصوصا اللهم زيد وبارك الكويت صارت زحمة . والاذاعات تعبانة لمستوى متدني جدا جدا جدا . فقلت خل اسمع له

بعدين قعدت اتمشى ابي شي يلفت انتهابي ، ليما مريت على بوث ، ولقيت شاب كويتي يوزع بروشرات ، خذيت منه البروشور كان عن كتاب اسمه لعنة الشطرنج ، المهم قريت ملخص الكتاب وجذي ، ولمحت كتابين كنت ادورهم لان شخص موصيني اني اشتريهم ، فسالته عن الكتب وقلت له اني جاي ابي اشتريهم وقالي انهم من احسن الكتب اللي ينباعون . المهم خذيتلي فره شوي بالبوث

وانا قاعد اطالع الكتب وخذيت الكتابين ولا اسمع هالشاب اللطيف قاعد يتكلم مع واحد ثاني عن الكتاب اللي عطاني البروشور ماله ” لعنة الشطرنح ” ولا جان اسمع هالجملة

لما ألفت الكتاب

لما ألفت الكتاب ؟؟؟ لحظة يعني انت المؤلف ؟؟ وما شاء الله قاعد توزع بروشرات حق كتابك !! انا طبعا ويهي قام يقط الوان ، تعرفون شنو يعني فشلة تسألون مؤلف عن كتاب مؤلف ثاني !! والله صراحة استحيت ورحت قلت له باخذ كتابك بس بشرط ” ارقع الموضوع يعني ” توقعلي ياه .. قالي تامر أمر

هالمؤلف اسمه علي بو ربيع

خذيت الكتاب مع الكتابين الثانيين ( راح اتلكم عنهم بــبوست منفصل ) ومشيت

وهذا كان اسم البوث

أظن انها موجودة يم مكتبة العجيري

وبعدين توجهت إلى بوث مكتبة ذات السلاسل واللي تضم اكثر من دار نشر ، ووقفت عند دار هالي للنشر لان لمحت كتاب قتيل الهوى ” غازي المضف ” بكميات كبيرة حيل ، وقالي اللي يشتغل ان ماشاء الله عليه طلب كبير علشان جذي جابوا كميات كبيرة

وهذي شوية صور من البوث

قبل لا امشي من البوث لمحت هالموسوعة وبين اي ولا اي ولا اي ولا ، قلت لا

كملت جولتي ، ولا الاقي بوث يبيع كتابي السنوي اللي لازم اشتريه كل سنة وطبعا هالسنة غير لان ان شاء الله في مشروع ان اسمي ينكتب فيه ان شاء الله وهو موسوعة جينيس للارقام القياسية . قلت بشتريه وبطلت بوكي ولا فلوسي خلصت ، سألت وين مكينة سحب قالولي برا عن ماكدونالدز . طلعت برا ( لازم يحطون مكاين سحب داخل ) ومريت من النافورة الحلوه الجميل ، للأسف ما جبت الترايبود مال الكاميرا ولا جان طلعت صورة مو طبيعية . خيرها بغيرها

سحبت ورجعت مره ثانية ولا الهندي اللي يشتغل سألني عن الكاميرا اذا تبع شركة ولا خاصة ، قلت له خاصة . جان يقولي صورني ، ابتسمت وقلت والله ماراح اخليها بخاطرك

وهذا اسم البوث

صارت الساعة 12 وانا عندي شوية مشاوير فقلت اوقف جولتي بس طبعا لازم امر على البوث اللي دايما اخليه مسك الختام

بوث دار نشر بلاتنيوم

طبعا بالنسبة لي ، هذي أفضل دار نشر عندنا بالكويت ، لان مركز طاقاتها على الشباب الجدد ، وماشاء الله عليهم طاقات جبارة ، عودت كل سنة (اخمط) 5-6 كتب واطلع ، وهالسنة خذيت تقريبا 5 او 4 مو ذاكر العدد ، والتقيت بالكاتب أحمد الحيدر مؤلف رواية عبث ، واستأذنته بهالصورة ، روحه حلوه ما شاء الله عليه

وبجذي نكون ختمنا جولتنا لمعرض الكتاب ، اتمنى ان التقرير يكون خفيف وحلو ( ادري انه شخصي وما غطى المعرض بشكل كامل ، بس علشان ضيق الوقت اللي كان عندي ) و ان شاء الله نشوفكم بالمعرض الياي

ملاحظة : راح احط بوست ثاني فيه الكتب اللي شريتها