المشاركة الأولى : ينانوة فيلكا

Published September 23, 2011 |

اتفقنا انا والربع نروحلنا رحله حق فيلجا الي الناس حاطه في بالها انها هالجزيره “فيها ينانوه” فعشان جذي ما يسكنون بالبيوت, وراح نعرف اذا هالحجي صح ولا لا من خلال القصه …

المهم .. حبينا نبيعها ونسوي نفسنا رياييل ونسكن بأحد البيوت الكثيره الي بالجزيره الي يقال والله اعلم ان فيها ينانوه, وتوكلنا على الله وانطلقت العباره الى الحزيره, تقريبا خذت نص ساعه على ما وصلت اذا ما خاب ظني, وكان وصولنا العصر وعقب ما وصلنا فيلجا انطلقنا ندور على بيتنا الي بنسكن فيه هاليومين بفيلجا, وبالفعل مشينا على العنوان ووصلنا البيت, البيت ما يوحى انه في شي شحلاته فيه حوش واكثر من مصفط حق السيارات, بس طبعا البنيان ماهو مثل بنيان الحين, بس نقدر نقول انه ينقعد فيه ونقزر فيه يومين.

حطينا قشنا وشلايلنا ودنابكنا وعدتنا وانطلقنا الى القريه التراثيه ما يحضرني اسمها صراحه, الي فيها بيوت والناس تسكن فيها وفيها ملاعب وقواري … الخ
وايضا يم هالقريه في فندق صغير للسكن, قزرنا يومنا بالبحر وهالقريه والبقيات, لما صار الليل رجعنا البيت ومعانا عشانا الصاج الي يطير العقل
فتعشينا وخلصنا وصار وقت السمره والطقطقه والوناسه الحين, فبلشنا سمرتنا واستانس الي استانس واستنزل الي استنزل
ويا وقت النوم عشان القعده من الصبح باجر.

اهني تبدي القصه اعزائي القراء الي قبل كان تسخين حق الي بتقرونه الحين.

كل واحد راح غرفته وطبعا كل غرفه فيها فراشين, وطبعا تعرفون سوالف الشباب والدقات الي يخرع الثاني وهالسوالف قبل النوم
بس جنها صارت صج! قعد نسمع اصوات غريبه قطاوه يتعافرون, عرفتوا لما قطوتين يتهاوشون شلون تصير اصواتهم؟ بالضبط هذا الي سمعناه
طلينا من الدريشه رحنا المطبخ ماكو قطوه ولا شي! قلنا يمكن قعد نحلم ولا شي, تعوذنا من ابليس ونمنا, وكانت الفير هالاصوات, ونفس الاصوات ليلحين موجوده
صراحه خقيناها, وقعدنا نتشاور شنسوي نطلع من البيت بهالليل وين نروح كل شي مصكر؟ قلنا ماكو الا الفندق الي مفتوح الحين
وليلحين نسمع الاصوات واحنا قعد نشيل شلايلنا, بس زادت اصوات القطاوه, وكل من قعد يسرع بترتيب اغراضه ويشيل شلايله عشان نطلع ونهج من هالبيت المسكون بأسرع وقت!
رحنا نبطل الباب الرئيسي ولا مقفول! تأكدنا يمكن احنا قافلينا وتذكرنا اصلا ان الباب ماله مفتاح!!
اهني صج خفنا وخقينا وايد, واشوه انه في باب ثاني بالمبطخ يطلع على الحوش, والحمد الله طلعنا من هالباب وكل واحد قعد يركض ودقينا السياره سلف ورحنا الفندق, اجرنا ليله لما الصبح
وردينا الكويت على اول عباره!
ولي يومكم محد من الربع راح فيلجا مره ثانيه!